Kubanjwe abarhanelwa ababini malunga nokubulawa kwamapolisa Kwilali yase Libode.
Kubanjwe abarhanelwa ababini malunga nokubulawa kwamapolisa Kwilali yase Libode.
Abarhanelwa abamabini abanjisiwe, logama abanye abamathathu bedutyulwe itshoba lal’umbethe, emva kokusungulwa kwesicwangciso seeyure ezingama-72 sokuzingela nokubamba abarhanelwa ababandakanyeka ekubulaweni kwamapolisa amabini eZiphunzana Location, eLibode, kufutshane neMthatha.
Esi sehlo senzeke ngentseni yangoLwesihlanu, ngowe-18 kweyoMsintsi ka-2026, emva kokuba amapolisa efumene ingxelo yokuba abatyholwa abaxhobileyo ahlasele ivenkile yasezitratweni (spaza shop) ngenjongo yokuphanga imali.
Amagosa asweleke kwesi sehlo nguWarrant Officer Thando Magoxo, oneminyaka engama-51, waseMthatha National Intervention Unit, kunye noConstable Ntlahla Tyhali, oneminyaka engama-30, waseMthatha Public Order Policing.
Kuthiwa la mapolisa abulawa ngelixa ebiza uncedo, logama izixhobo zawo zomsebenzi zathathwa ngexesha lohlaselo.
UMSEBENZI WOKUZINGELA ABARHANELWA
Emva kokufunyanwa kwenkcukacha-vela, amaqela eMthatha Crime Intelligence kunye neMthatha K9 aqhube umsebenzi wobuntlola eNgolo Location, eSibangweni.
Lo msebenzi ukhokelele ekubanjweni kwabarhanelwa ababini abaneminyaka engama-29, indoda nomfazi, ekurhanelwa ukuba babeneAK-47 kunye neembumbulu.
Aba babini bajongene namatyala anxulumene nokuba nezixhobo nemipu ngokungekho semthethweni.
Kwangobo busuku, malunga no-23:55, amalungu eNational Intervention Unit (NIU) afumana inkcukacha yokuba omnye wabasolwa wayekwiN2 eSibangweni Location, eLibode, esingise eTsolo.
Xa amapolisa afika, kuthiwa umsolwa wathulula ngeembumbulu kwabakwantsasana, bandula ukusabela ngezabo iimbumbulu.
Umrhanelwa oneminyaka engama-35 wadutyulwa wanabel’uqaqaqa, kwaza kwafunyanwa umpu oneembumbulu ezintathu.
Imisebenzi yokulandelela yaqhubeka yaza yakhokelela ekubeni amanye amadoda amabini, ekurhanelwa ukuba anxulumene nokubulawa kwamapolisa, adutyulwe asweleka eNgolo Village, eLibode.
imipu emibini zifunyenwe kwezi ndawo.
Oku kwenza ukuba inani labarhanelwa abadutyulwe babhubha lifikelele kwabathathu.
Lilonke, amapolisa athi afumene i-AK-47 enye kunye nemipu emithathu yezandla enxulumene nolu phando.
Amatyala aquka ukuhlaselwa kwamapolisa, ukuzama ukubulala, ukuba nezixhobo neembumbulu ngokungekho semthethweni, kunye neinquest docket, ayaqhubeka nokuphandwa.
I-Independent Police Investigative Directorate (IPID) nayo ibandakanyekile kuphando lweziganeko apho abantu badutyulwe babulawa ngamapolisa.
UKhomishinala wamaPolisa eMpuma Koloni, uLieutenant General Vuyisile Ncata, uncome amaqela asebenze kolu phando, esithi umsebenzi wobuntlola ukhokelele ekubanjweni kwabasolwa ababini nasekudutyulweni kwabanye abathathu ngexesha lokudibana namapolisa.
Uthe amapolisa aza kuqhubeka nomsebenzi wawo de bonke abo babandakanyekayo bajongane nomthetho, waza wadlulisa amazwi ovelwano kwiintsapho zamapolisa aswelekileyo nakuluntu lwamapolisa.
