INkundla Ephakamileyo Ichitha Isicelo se-ANC Sokuvuselela iProvincial Task Team yaseMpuma Koloni
By Lilitha Mdakana
INkundla Ephakamileyo yaseMpuma Koloni ichithe isicelo se-African National Congress (ANC) sokufuna imvume yokubhena kwisigqibo esachaza ukuba i-Provincial Task Team (PTT) yeli qela kweli phondo yayisekwe ngokungekho mthethweni kwaye ingasebenzi.
Esi sigqibo sithetha ukuba i-ANC eMpuma Koloni ayinabo ubunkokheli besikhashana obuqinisekisiweyo ngokusemthethweni ngeli xesha, njengoko iqela liqhubeka nokulandela amanyathelo asemthethweni.
Imbambano yasenkundleni yaqalwa ngamalungu e-ANC, uSinethemba Mpande, uNompumelelo Mzothwa noLwazi Rotya, abathi baphumelela ukufumana umyalelo wenkundla othintela iqela ekubambeni inkomfa yalo yokonyula ubunkokheli bephondo ngenxa yeengxaki ezazinxulumene neenkqubo zenkomfa.
Emva kokurhoxiswa kwale nkomfa, uNobhala-Jikelele we-ANC, uFikile Mbalula, waseka i-Provincial Task TeamngoCanzibe ukuze ilawule imicimbi yeqela kweli phondo. Eli qela lalikhokelwa nguNkulumbuso weMpuma Koloni, u-Oscar Mabuyane, kwaye lalijongwe ukuba lisebenze de kubanjwe inkomfa entsha yephondo.
Nangona kunjalo, la malungu e-ANC aya enkundleni ephikisa ukusekwa kwale task team, esithi ayihambelani nomgaqo-siseko weqela, imigaqo yalo yangaphakathi kunye namalungelo amalungu.
INkundla Ephakamileyo yaseMakhanda yagweba ixhasa abafaki-zicelo, yaza yathi i-Provincial Task Team ekhokelwa nguMabuyane ayisemthethweni kwaye ayisebenzi.
Emva kwesi sigqibo, i-ANC yafaka isicelo sokubhena yaza yacela ukuba kuphazanyiswe ukusebenza kwesi sigqibo ngelixa inkqubo yezomthetho iqhubeka phantsi kwecandelo le-Section 18(2).
Kwingxelo ekhutshwe ngoLwesine ebusuku, i-ANC ivumile ngesigqibo samva nje senkundla, kodwa yathi iza kuqhubeka nokusebenzisa amalungelo ayo asemthethweni.
Iqela lithe liza kubhena kwi-Supreme Court of Appeal (SCA), lisithi lifuna ukuqhubeka nokucela umngeni kwisigqibo senkundla.
Le mbambano yasenkundleni yongeza kolunye uxinzelelo kwiinzame ze-ANC zokuzinzisa izakhiwo zayo eMpuma Koloni, ngelixa ilungiselela indlela eya kwinkomfa entsha yobunkokheli bephondo.
