By Lilitha Mdakana

GONUBIE — Intsebenziswano phakathi kwe Eastern Cape Missing Person and Trafficking Unit kunye namapolisa aseGonubie ikhokelele ekubanjweni komntu ongaphandle ongenamaxwebhu asemthethweni, otyholwa ngokufunyanwa enemayeza alawulwayo.

Ngokwamapolisa, lo msolwa ubanjwe ngexesha lomkhankaso wamapolisa obuqhutywa eGonubie. Amapolisa kuthiwa afumene amayeza alawulwayo kumsolwa, nto leyo ekhokelele ekubanjweni kwakhe nasekuthathweni kwala mayeza ukuze kuqhutyekwe nophando olunzulu.

Amayeza alawulwayo alawulwa phantsi kwemithetho yaseMzantsi Afrika, yaye ukusetyenziswa, ukuphathwa, ukuhanjiswa okanye ukuthengiswa kwawo kunokufuna iprescription kagqirha okanye imvume esemthethweni, ngokuxhomekeke kuhlobo lwamayeza.

Umsolwa uvalelwe kwisikhululo samapolisa kwaye kulindeleke ukuba avele kwiNkundla kaMantyi yaseMonti. Okwangoku, abasemagunyeni abakakhuphi iinkcukacha malunga nohlobo nobungakanani bamayeza athathiweyo.

Amapolisa athi ukubanjwa kwalo msolwa yinxalenye yemizamo eqhubekayo yokulwa izenzo ezingekho mthethwenikunye nokuqinisekisa ukuthotyelwa kwemithetho yezempilo neyokufuduka eMzantsi Afrika.

Uphando lusaqhubeka, ingakumbi malunga nomthombo wala mayeza kunye nendlela ekwakucwangciswa ukuba asetyenziswe okanye asasazwe ngayo.

Ifoto: Yonela Nokwe