By Lilitha Mdakana

Amapolisa neSebe lezeKhaya ziqinisa uhlolo lokufudukela elizweni

KuGompo, Mpuma Koloni — 10 Agasti 2026

Abantu bangaphandle abayi-86 abangenamaxwebhu asemthethweni okuba selizweni bathunyelwe kwisikhululo samapolisa saseKuGompo ngeCawa, emva komsebenzi odibeneyo wamapolisa kunye namagosa eSebe lezeKhaya (DHA).

Lo msebenzi ubukhokelwe yi-Eastern Cape Missing Person & Trafficking Unit, ngentsebenziswano namagosa e-Sebe lezeKhaya kunye ne-Public Order Policing Unit.

Uhlolo lwenziwe kwiindawo ezahlukeneyo zaseKuGompo, kuquka iBuffalo Street, College Street, Quigney neFleet Street. Amagosa ebegxile ekuqinisekiseni ukuba abantu banamaxwebhu afunekayo, kuquka iipasi, ii-visa namanye amaxwebhu asemthethweni.

Ngokwamagosa, bonke abantu abangama-86 basiwa kwisikhululo samapolisa saseKuGompo ukuze kuqinisekiswe imeko yamaxwebhu abo. Iimeko zabo ziza kuhlolwa ngokwemithetho yaseMzantsi Afrika elawula ukufudukela nokuhlala kwabantu kweli lizwe.

Amagosa athi lo msebenzi uyinxalenye yemizamo eqhubekayo yokuqinisekisa ukuba imithetho yokufudukela elizweni iyathotyelwa, kwakunye nokujongana nemiba enxulumene nabantu abangenamaxwebhu asemthethweni.

Amapolisa athe imisebenzi yolu hlobo iza kuqhubeka kwiindawo ezahlukeneyo kwiphondo, ngenjongo yokuqinisekisa ukuthotyelwa kwemithetho yesizwe.

Umfanekiso: Mihlali Mngaza / Eastern Cape Missing Person & Trafficking Unit