By Lilitha Mdakana

UMongameli we-United Democratic Movement (UDM), uGeneral Bantu Holomisa, ubhengeze ngokusemthethweni ukuba uNqabayomzi Kwankwa, iSekela Mongameli leqela, uza kuba ngumgqatswa wosodolophu weBuffalo City Metropolitan Municipality kunyulo loomasipala luka-2026.

Esi sibhengezo senziwe kwibala lezemidlalo lasePhakamisa eQonce, eMpuma Koloni, apho amalungu nabalandeli be-UDM babehlanganisene khona njengoko iqela liqinisa iphulo lalo lokunyula abameli balo kulo lonke eli metropolis.

Ukutyunjwa kukaKwankwa bekulindelwe ngabomvu, ingakumbi emva kweengxelo zokuba i-UDM iceba ukufaka omnye wamalungu ayo aphezulu kumlo wokufuna ulawulo lwe Buffalo City.

Ethetha emva kwesi sibhengezo, uKwankwa uthe uziva enesidima esikhulu ngokunikwa kwentembeko liqela. Uthembise ukuba, ukuba unyulwe njengosodolophu, uza kukhokela ngesibindi, ngokuthobeka nangesidima, ebeka iimfuno zabemi phambili.

Phakathi kwezinto athe uza kuzigxininisa kukuphucula ukuhanjiswa kweenkonzo, ukuqinisekisa ukuba amazwi oluntu ayaviwa nokusebenza nzima ukuze kubuyiselwe ukuthembana phakathi kwabemi norhulumente wasekhaya.

UKwankwa ukwathe uzibophelele ekuphumezeni imanifesto ye-UDM enemizila eli-12, esithi iqela linecebo elicacileyo lokuguqula iBuffalo City nokwakha umasipala osebenzela bonke abemi.

“Ma-Buffalites kunye nam, ixesha lokuba iBuffalo City iphakame kwakhona lifikile,” utshilo uKwankwa.

Uye wabongoza amalungu eqela, amavolontiya kunye nabagqatswa bamawadi ukuba basasaze umyalezo we-UDM wethemba notshintsho kuzo zonke iindawo zale metropolis.

UKwankwa usebenze njenge Lungu lePalamente ukusukela ngo-2013, kwaye ungomnye wabantu ababalulekileyo ngaphakathi kwe-UDM kuzwelonke.

Ukutyunjwa kwakhe kulindeleke ukuba kuqinise ukhuphiswano lwezopolitiko eBuffalo City, njengoko amaqela ezopolitiko elungiselela ukufaka abagqatswa bawo abomeleleyo kunyulo loomasipala luka-2026.

IBuffalo City, engomnye woomasipala ababalulekileyo eMpuma Koloni, kulindeleke ukuba ibe yenye yeendawo eziza kujongwa kakhulu ngexesha lephulo lonyulo, njengoko amaqela ezopolitiko esilwela ukufumana inkxaso yabavoti nokulawula umasipala.