By Lilitha Mdakana

EQUMBU – Umsindo ubonakale ngokucacileyo kwaMasipala waseQumbu ngoLwesibini, xa abaqhubi beetaxi besiya kwiiofisi zikamasipala bephethe uqhankqalazo lwabo, bepaka iinqwelo-mafutha zabo phambi kweeofisi.

Abaqhubi, abaphantsi kwe Uncedo Taxi Association, bathi sele kudlule ixesha besoloko bevakalisa iinkxalabo zabo, kodwa bengafumani mpendulo okanye izisombululo abazilindeleyo.

Bathi izigqibo ezithathwa ngabasemagunyeni ezichaphazela ishishini lezothutho ziye zabeka uxinzelelo olukhulu kubo, nto leyo abathi ichaphazela ngqo indlela abaziphilisa ngayo kunye neentsapho zabo.

Kwisiganeko esibonise ubunzulu bokungoneliseki kwabo, abaqhubi baye banikezela ngezi nqwelo-mafutha kumasipala, besithi abasemagunyeni basekuhlaleni mabangaphindi bajonge ecaleni, koko bathathe inyathelo elibonakalayo ekusombululeni iingxaki ezijongene neshishini labo.

Abaqhubi bathi bafuna ukuvakala, ukuphendulwa nokufunyanwa kwezisombululo, njengoko besithi ikamva labo kunye nokuphila kweentsapho zabo kuxhomekeke kwindlela ezi ngxaki zisonjululwa ngayo.

Olu qhankqalazo lubeke umasipala waseQumbu phantsi koxinzelelo lokujongana ngqo nezikhalazo zabaqhubi kunye nemingeni ejongene necandelo lezothutho kule ngingqi.

Iifoto: Syoyo Fotos