INKXASO ENGAPHEZU KWE-R1.3 MILLION KWINKAMPANI YOBUGCISA YOLUTSHA EMDANTSANE
Isiqalo Youth Fund
NguMike Mancane
Inkampani yobugcisa ezinze eMdantsane, i-Labtronics (Pty) Ltd, ifumene inkxaso enkulu emva kokuba uRhulumente wePhondo leMpuma Koloni enikezele ngesithuthi (i-panel van) nezixhobo ze-ICT ezixabisa ngaphezu kwe-R1.3 million kusetyenziswa ingxowa-mali i-Isiqalo Youth Fund.
Umsitho wonikezelo olusesikweni ububanjelwe kwiHolo yeSixeko saseMonti, apho oosomashishini abaliqela abaselula baxhotyiswe ngezixhobo ezingundoqo ezijoliswe ekwandiseni imisebenzi yabo, ukudalwa kwamathuba emisebenzi, nokuqinisa inxaxheba yabo kuqoqosho lwephondo.
I-Labtronics, egxile kwi-videography, ukufota, i-podcasting, imveliso ye-audio-visual, kunye ne-AVL consulting, iyamkele le nkxaso-mali. Umseki noMlawuli woBugcisa, uThobani Vumindaba, uthe le nkxaso intsha izakuphucula kakhulu ukuhamba-hamba kwabo kunye nomgangatho wemveliso.
> “Ezi zixhobo kunye nesithuthi ziza kwenza kube lula kuthi ukuba sikwazi ukuhamba-hamba. Besikade sijongene nemingeni yokusuka kwindawo ukuya kwenye ngenxa yokuba besinemoto encinci nezixhobo ezinganeleyo,” utshilo.
Emele uMasipala ombaxa weBuffalo City, uSodolophu oLawulayo uPrincess Faku, ugxininise ukukhula ngokukhawuleza kweli candelo lobugcisa waza waphinda wagxininisa ukuzinikela kukarhulumente ekuxhobiseni amashishini olutsha.
